Turkistonni Rossiya imperiyasining mustamlakachilik siyosati va zulmidan qutqarish, o‘lkamizni ozodlikka olib chiqarish, milliy davlatchiligimizni tiklash Mahmudxo‘ja Behbudiy va uning maslakdoshlarining bosh g‘oyasiga aylangandi.  
     Shu ma’noda, Prezidentimizning 2025 yil 3yanvardagi “Turkiston jadidlik harakatining asoschisi, atoqli adib va jamoat arbobi, noshir va pedagog Mahmudxo‘ja Behbudiy tavalludining 150 yilligini keng nishonlash to‘g‘risida”gi qaror hech bir mubolag‘asiz tarixiy hujjat sanaladi. Negaki Mahmudxo‘ja Behbudiyning 3000 yillik milliy davlatchilik tariximizda tutgan o‘rni chindan ham tengsizdir. Qarorda alohida urg‘u berilganidek, Mahmudxo‘ja Behbudiy milliy ozodlik harakatining buyuk namoyandasi sifatida ilm-fan, ta’lim va tarbiya, adabiyot va san’at, matbuot sohalarini rivojlantirish, jahondagi ilg‘or taraqqiyot yutuqlarini o‘zlashtirish orqali xalqimizning ongu tafakkurini yuksaltirish hamda hurriyatga erishish yo‘lida o‘z hayotini baxsh etgan fidoyi zotdir”.
     Bugun – Mahmudxo‘ja Behbudiy tug‘ilgan kunda “Turon” kutubxonasida bo‘lib o‘tgan umummilliy yig‘in ham buyuk ajdodimizni eslash, uning, bir tomondan, sharafli va, ikkinchi tomondan, mashaqqatli umr yo‘li, boy ijodiy merosini o‘rganish bo‘yicha so‘nggi izlanishlarda qo‘lga kiritilgan ilmiy natijalarni ommalashtirishga bag‘ishlandi.
Tarix instituti direktori, akademik Azamat Ziyo Mahmudxo‘ja Behbudiy shaxsi, umuman Jadidchilik milliy harakatining yuzaga chiqishida Prezidentimiz Shavkat Mirziyoyevning tarixiy xizmatlariga alohida urg‘u berib, mustaqillik yillarida ham o‘tmishimizning eng yorqin shaxslari va saboqli davrlari “qora ro‘yxat”ga tushganini eslatib o‘tdi.
Shundan so‘ng Mahmudxo‘ja Behbudiyning: 1) davlatchilik qarashlariga oid; 2) ijtimoiy masalalarga oid (ta’lim, tarbiya, din, xotin-qizlar muammolari va boshqalar); 3) noshirchilik ishlariga bag‘ishlangan jami 9 ta ma’ruza tinglandi.
     “Mahmudxo‘ja Behbudiy va Turkiston jadidchiligi” umummilliy ilmiy yig‘inda bildirilgan ilmiy qarashlar, ma’rifiy fikrlar xalqimiz, ayniqsa, yoshlarni tarixiy bilimlar bilan qurollantirish, yurt uchun kuyunib yashash, tinchlik-osoyishtalik, ozodligimizni ko‘z qorachig‘idek qo‘riqlashdek muqaddas burchni bajarish ishiga xizmat qiladi degan umiddamiz.