Аkademik Yahyo Gʼulomov nomidagi Oʼzbek xalqi va uning davlatchiligi tarixi ilmiy seminari

Seminar 1998-yil 27-iyuldagi “Oʼzbekiston Respublikasi Fanlar Аkademiyasi Tarix instituti faoliyatini takomillashtirish toʼgʼrisida”gi farmon bilan tashkil etilgan.
Seminarning maqsadi butun ilmiy jamoatchilikni qadimshunoslik, tangashunoslik, elshunoslik, manbashunoslik, sharqshunoslik, tarixshunoslik sohalarining soʼnggi yutuqlari bilan tanishtirish, tarix sohasida keng targʼibot ishlarini olib borish, mamlakatning barcha mintaqalaridagi tarixchilarni ilmiy jihatdan birlashtirishga xizmat qilishdan iboratdir.
Oʼtgan yillar ichida Fanlar akademiyasi Tarix instituti tashabbusi bilan 77 ta yigʼin oʼtkazildi. Respublikamizning deyarli barcha viloyat markazlarida oʼtkazilgan ushbu ilmiy seminarda “Oʼzbek davlatchiligi tarixi”ning turli bosqichlariga oid, eng yangi maʼlumotlar keng ommaga eʼlon qilindi. Masalan, oxirgi besh yillikda ilmiy seminarda Samarqand qishloq xoʼjalik instituti, Urganch davlat universiteti, Samarqand davlat universiteti, Аrxeologiya milliy markazi, Qoʼqon davlat pedagogika institutlari bilan hamkorlikda oʼtkazilgan ilmiy seminarlarda maxsus ilmiy seminarning natijasi sifatida ilmiy kitoblar nashr qilindi. 
Seminar yigʼilishida oʼzbek xalqi etnogenezi, uning madaniyati, sanʼati va diplomatiyasining oʼziga xos xususiyatlari, hamda din masalalari muhokama qilinadi. Mustaqil Oʼzbekiston taraqqiyotining gʼoyaviy asoslari, millatlararo totuvlik va madaniy aloqalarga bagʼishlangan maxsus yigʼilishlar ham boʼlib oʼtdi. Oʼtgan davr davomida muayyan uchrashuvlar viloyatlar tarixi, xususan, Qashqadaryo va Surxondaryo vohalari, Samarqand va Zarafshon vohasining oʼrni, Xorazm tarixi, Fargʼona vodiysiga bagʼishlandi.
Barcha uchrashuvlar Oliy va oʼrta maxsus taʼlim, Xalq taʼlimi vazirliklari, Xorazm Maʼmun Аkademiyasi va mamlakatimizning yetakchi oliy oʼquv yurtlari bilan hamkorlikda oʼtkazildi (1-ilovada oʼtkazilgan tadbirlar roʼyxati keltirilgan).
Yahyo Gʼulomov nomidagi seminar bugungi kunda ham faoliyat koʼrsatmoqda. Uning tashkilotchilari eng yaxshi ishlar va maʼruzalar natijalari asosida maqolalar toʼplamlarini chop etishmoqda. Seminar shu qadar ommalashdiki, uning “Samarqand oʼqishlari”, “Xorazm oʼqishlari”, “Qoʼqon oʼqishlari” kabi mintaqaviy shoʼbalari tashkil etildi.
1998-yildan seminar faoliyatiga tarix fanlari doktori, professor Dilorom Аlimova boshchilik qilib kelmoqda.